Description

هذه اللوحة أغلى عليّ من روحي، وأقرب لقلبي من أي شيء أملكه. يمكن تشوفونها مجرد شخابيط وألوان مالها معنى، لكن بالنسبة لي هي مو مجرد لوحة، هي ذكرى، وحكاية، وجزء من روحي، وشيء يربطني بأغلى إنسان فقدته في حياتي. بدأت أرسمها في الأيام اللي كنت أعتني فيها بأبوي، الله يرحمه ويغفر له. كنت أرسمها وأنا أعيش معاه أيام وتفاصيل ما راح أنساها طول عمري، لكن شاء الله إني أتعرض لحادث خلاني مقعدة، وما قدرت أكمل رسمها وقتها. ولما قدرت أرجع وأكملها، كنت أنتظر اليوم اللي يرجع فيه أبوي للبيت، وأوريه اللوحة اللي رسمتها، وأجلس معاه وأحكي له عن تفاصيلها، وعن كل لون وكل شيء فيها. كنت أتخيل ردة فعله وكلامه، وكنت أتمنى أشوف نظرته لها. لكن للأسف، اليوم اللي انتظرته ما جاء، وأبوي توفاه الله قبل ما أحقق هالأمنية. ومن يوم وفاته، ظلت اللوحة عندي سنة و11 شهر، محتفظة فيها وكأنها قطعة منه، وكل ما طالعتها أتذكر الأيام اللي كنت أرسمها فيها وهو موجود بحياتي. واليوم، ولأول مرة، أعرض أغلى شيء عندي للبيع، مو لأني استغنيت عنها، ولا لأنها فقدت قيمتها عندي، لكن بسبب ضائقة مالية أمر فيها واضطرتني أتخلى عن شيء كنت أتمنى أحتفظ فيه طول عمري. والله يعلم إنه لولا هالظرف، ما كنت أفكر أبيعها مهما كان الثمن. أما بالنسبة للسعر، فما راح أحدد لها مبلغ، وبترك لكم حرية تقدير قيمتها، واللي تجيبه خير وبركة من الله. يمكن اللي يشتريها يشوفها مجرد لوحة يعلقها على جدار بيته، لكن أتمنى يعرف إنها كانت يومًا حلم بنت تنتظر رجعة أبوها، عشان توريه شيء رسمته بيدها وتحكي له عنه. هي مو مجرد لوحة أعرضها للبيع، هي ذكرى من عمرٍ ما يرجع، ومن إنسانٍ ما يتعوض. الله يرحم أبوي ويغفر له، ويجعل مثواه الجنة.